Затворени се операционите сали и хируршкото одделение во струшката болница бидејќи хирурзите се разболеле од мали сипаници. Одлуката на 10 дена да се затвори одделението ја донела Комисијата за интерхоспитални инфекции во болницата. Од Комисијата за НОВА потврдија дека операции нема да се прават, а итните случаи ќе се праќаат во болницата во Охрид.
„Ќе работи само амбулантата. Одделението се затвара на 10 дена додека да помине инкубацијата за сипаниците да не се шират“, потврдија за НОВА во Комисијата за интерхоспитални инфекции.
Од Комисијата велат дека засега од мали сипаници се разболеле седум лекари и медицински сестри на хируршкото одделение, а од почетокот на епидемијата половина од персоналот ја прележале болеста.
Извори за НОВА велат дека хирурзите одбиле да се вакцинираат, а се вакцинирале само гинеколозите и интернистите. Хирурзите не ја почитувале наредбата на Министерството за здравство во која се вели дека треба да се вакцинира целиот медицински персонал, а доколку се вакцинирани или веќе ја прележале болеста да достават вакцинален картон или доказ за антитела преку земање на крв.
За состојбата со сипаниците во струшката болница денеска е известен и Државниот санитарен и здравствен инспекторат и Министерството за здравство. Лекарите велат дека не е исклучена можноста рокот за неработење на хируршкото одделение во Струга да биде продолжен и после овие 10 дена.
Инаку, покрај тоа што е затворено хируршкото одделени и времено се запрени операциите, како и вакцинирање на персоналот издадена е наредба да се исчисти и направи дезинфекција на целото хируршко одделение.