На пат кон државата се 20 000 тестови за испитување на Ковид -19 и уште 5000 тестови се донација од приватна лабораторија каде што ќе се вршат тестирањата. Казни за сите банки кои не ги почитуваат препораките и пред нивните објекти има редици и хаос од луѓе
Се затвора Заводот за рехабилитација во Козле каде што беше хоспитализиран пациент на кој му беше дијагностициран Ковид 19, резултите од тестовите покажале дека со короновирус се заразиле 8 медицински лица и двајца пациенти, информира министерот за здравство Венко Филипче,
„Во Заводот за физикална медицина тестирани се 46 вработени и 6 пациенти. Позитивни се 8 медицински лица и двајца пациенти. Денеска се тестирани уште 16 пациенти, резултатите гои очекуваме. Заводот нема да работи во следниот период , а лицата кои имаат потреба од таков вид медицинска услуга ќе може да ја добијат во Болницата „8 Септември““, рече Филипче.
Заводот денеска функционираше, дел од вработените не доаѓаат на работа, се во самоизолација, а министерот најави дека по земањето на тестовите на сите кои што е потребно институцијата до крајот на неделата ќе биде ставена под клуч.
Утрово на Клиниката за инфективни болести и фебрилни состојби во Скопје почина еден пациент на 79 години, од Дебар. Пациентот е дијагностициран позитивен на Ковид-19 на 23 март, а со влошена здравствена состојба хоспитализиран на клиниката во Скопје на 25 март. Со ова бројот на починати се зголеми на 7 лица. Пикот на вирусот се очекува за еден месец, а надлежните се надеваат дека линеарно ќе биде зголемувањето на бројот на заболени, како и досега.
Во изминатите 24 часа се регистрирани 26 нови случаи на коронавирус во земјата, вкупната бројка на дијагностицирани пациенти со КОВИД-19 во земјата изнесува 285 лица.
Филипче информира дека на уште една жена која починала викендов во болницата во Струга посмртно и е земен материјал за тестирање, бидејќи не била дијагностицирана со Ковид 19, но ги имала истите типични спмптоми, а потоа доколку се докаже болеста ќе се види како ќе се постапува со луѓето со кои била во контакт.
Во болницата во Охрид е назначен нов директор, Горан Балевски, завршил инспекцискиот надзор но, сеуште се прават анализи.
„Да ги почекаме конечните резултати, се проверува целокупната документација. Има докази за одредени пропусти во однос на пациентката од Струга која почина, а не била примена на инфективното одделение во болницата во Охрид“, рече Филипче.
Министерот најави увид и во медицинската докумeнтација на31 годишното момче кое што почина вчера на Инфективната клиника. Неговата смрт предизвика загриженост но и сомнеж кај граѓаните, со оглед на тоа што немал претходни заболувања, а тие што го познаваат велат дека немал ниту значителна прекурна тежина.
Добра вест, рече Филипче, е што денеска од Клиниката за инфективни болести и фебрилни состојби во Скопје се испишани 9 пациенти (8 од Дебар и 1 од Скопје) кои на два контролни теста на Ковид-19 имаа негативен резултат. Нивната здравствена состојба е добра и тие заминаа дома.
„На Инфективната клиника се хоспитализирани 45 пациенти, 8 се на репиратор, а 9 на кислородна поддршка. И пациентите во друготе болници во државата се во добра состојба со слаба клиничка слика“, изјави Филипче. Од денеска започна да функциорира и пунктот за земање на брисеви во поликлиниката Чаир, а од среда ќе започне и во Млин Балкан.
До крајот на недела ќе започне да функционира и мобилната болница пред Инфективна клиника со капацитет од 130 кревети. Со ова и со целокупниот капацитет на клиниката со 110 легла кој е целосно резервиран само за болните со Ковид 19 ќе има доволно место доколку се зголеми бројот на заболени, посочи министерот.
Тој најави дека на пат кон државата се 20 000 тестови за испитување на Ковид -19 и уште 5000 тестови добиени како донација од приватна лабораторија каде што ќе се вршат тестирањата. Дневно се прават меѓу 200 и 300 тестови во ИЈЗ, 30 во Ветеринарниот институт и по 30 во трите лаборатории за кои Комисијата за заразни болести денеска одлучила дека ќе можат да се приклучат во тестирањето. Министерот се заблагодари на донацијата од 7 милиони евра обезбедена од евроамбасдарот Самјуел Жбогар.
На прашање на НОВА дали државата ќе воведе ред пред банките бидејќи сами очигледно не можат да го сторат тоа, Славјанка Петровска, заменик министерка во МВР која присутвуваше на прес конференцијата одговори:
„Го видовме хаосот и редиците пред банките. МРВ не може да испрати свои службени лица таму бидејќи се потребни на други места, но ќе има казни за сите оние кои што не ги почитуваат препораките“, најави Петровска.