Апелацискиот суд донесе одлука според која Мухамед Зеќири, поранешниот генерален секретар на Владата останува во притвор во истражниот затвор „Скопје“ во Шуто Оризари.
Апелациските судии го прифатија мислењето на Обвинителството за гонење организиран криминал дека Зеќири може да побегне или да влијае на сведоци.
Осомничениот Зеќири на јавната седница во петокот рече дека нема намера да бега, и дека ако сакал да го стори тоа на располагање имал повеќе од една година.
„Ниту имам намера, ниту имам зошто да бегам и да се кријам од органите на прогон. Сакам да напоменам дека бев во тек со предистражната постапка поради функцијата што ја вршев. Јас одобрив да се дадат сите документи што ги побараа од мене. Да сакав да бегам, имав време повеќе од една година додека се водеше постапката за која знаев. Првиот пат кога беше предложена мерката притвор поднесов оставка, за да не ја попречувам истрагата што се води против мене. Не размислувам ниту имам зошто да бегам. Фамилијарен човек сум, се грижам за четири деца, имам две од првиот брак и имам двегодишна ќерка и посинокот на мојата сопруга, кој е малолетен. Во однос на родителите на сопругата, кои живеат во Германија, сакам да посочам дека тие сега живеат во Македонија, имаат регулиран престој. Тие живеат заедно со нас. Немам намера, ниту имам зошто да бегам. Сакам во фер постапка да докажам дека сум невин“, кажа Зеќири пред Апелацискиот суд на седницата на која се разгледуваше неговото барање да му биде укинат притворот.
Мухамед Зеќири е осомничен за злоупотреба на службената положба и овластување. Според обвинителството, без спроведување на соодветна постапка за јавна набавка, склучил договор за консултантски услуги со правно лице во што му помогнале осомничените хрватски државјани.
„Со преземените дејствија осомничените за правното лице прибавиле значителна противправна имотна корист во вкупна вредност од 57.932.100,00 денари, а на штета на буџетот на Република Северна Македонија. Износ што бил поголем од 795.000 евра, односно од договорениот износ за вршење на консултантските услуги“, соопшти обвинителството за гонење организиран криминал и корупција.
Дента кога му беше одреден притвор, Зеќири даде оставка и од позицијата генерален секретар на Владата. (Р.Н.)