На претстојните локални избори во Советот на Град Скопје мораме да внесеме што повеќе слободумни граѓани, порачаа од иницијативата Зелен хуман град (ЗХГ), која настапува со независна советничка листа на претстојните локални избори.
Носителката на листата, Драгана Велковска, на заедничка прес-конференција со независната кандидатка за градоначалничка, Ана Петровска, рече дека „Скопје е пред крстопат, бидејќи во претстојниот мандат ќе се носи новиот Генерално урбанистички план (ГУП)“.
– Скопје е пред крстопат, со носењето на Генералниот урбанистички план (ГУП) во претстојниот мандат ние ќе знаеме дали ќе имаме или ќе немаме град, и тоа не смее да се носи во раце на корумпирани политичари, во раце на луѓе кои досега докажаа дека немаат интерес да го штитат јавниот интерес. Затоа мораме во Советот да внесеме што повеќе луѓе кои со својот минат, долгогодишен активизам, во најголем дел волонтерски, докажале дека тие се всушност единствените кои се грижат за доброто на овој град и на скопјани. Не може таквите луѓе да останат надвор од институциите. Ние досега бевме институции во сенка, им ја вршевме работата на оние кои ги бираа клиентелистички, на оние кои добиваа места во советите и во институциите преку гласови кои беа уценувани и тоа мора да прекине, изјави Велковска.
Таа побара поддршка од скопјани за, како што рече, да се излезе од 30-годишното малтретирање и независни луѓе коишто не се диригирани од центрите да моќ да можат да работат за заедничко добро.