До почетокот на јуни Русија планира да мобилизира и на линијата на фронтот да донесе дополнителни 300 илјади војници, изјави Украинскиот претседател Володимир Зеленски.
Коментарите на Зеленски дојдоа само неколку дена откако Владимир Путин ја почна пролетната регрутација за време на која 150 илјадиграѓани беа повикани на воена служба.
Москва неодамна зема замав по повеќе од две години војна против Киев. Сепак, инвазијата ја чинеше Русија многубројни жртви, а според американските разузнавачи, се проценува дека од почетокот на конфликтот Кремљ изгубил повеќе од 315 илјади војници.
Ниту Украина не остана без големи загуби. Во февруари Зеленски рече дека од избувнувањето на војната биле убиени 31 илјада војници, но американските власти тврдат дека бројката е околу 70 илјади и над 120 илјадиповредени. Зеленски во средата потпиша промена во законот со кој во случај на итност се намалува старосната граница за мобилизација на мажи од сегашните 27, на 25 години.
Оксана Заболотна, аналитичар на украинската влада во Центарот за набљудување, рече дека намалувањето на старосната граница за регрутирање може да додаде околу 50 илјади војници во украинската армија.
Украинскиот претседател пред новинаритре уште дополни дека на Киев му е јасно зошто Русија сака да регрутира дополнителни војници и заклучи дека мај и јуни треба да бидат време за постигнување на целите на Украина во војната.
Јасно разбираме за што се подготвува Русија, што сакаат и за што ќе регрутираат војници. Сите ние и нашите партнери мора да имаме силен одговор на руските операции. Мора да ја добиеме оваа војна, рече Зеленски.