Сиромаштијата и невработеноста се најголемиот проблем за 30,0 отсто од граѓаните, а за една четвртина од нив (25,9 отсто) тоа е корупцијата и криминалот.
Владата не ги исполнила очекувањата на мнозинството граѓани.
Помеѓу доволен и добар или 2,44 е средната оценка што граѓаните и ја дале на Владата за нејзината работа во првите 100 дена, покажаа резултатите од последното истражување на Македонскиот центар за меѓународна соработка (МЦМС) „100 дена Влада“ спроведено во периодот од 3 до 13 мај 2022 година.
Мнозинство од граѓаните (65,1 отсто) изјавиле дека Владата не ги исполнила нивните очекувања.
Меѓу нив, побројни се етничките Македонци. Прашани за исполнување на очекувањата во конкретни подрачја, секој петти граѓанин рекол дека неговите очекувања не се исполнети во ниту едно подрачје.
Фатмир Битиќи, заменикот на претседателот на Владата има најдобар резултат од позитивните и негативните мислења на граѓаните за тоа како функционерите си ја вршат работата. Зад него се министерот за внатрешни работи Оливер Спасовски, за финансии Фатмир Бесими, и за транспорт и врски Благој Бочварски, сите со ист резултат.
Повеќе од половината граѓани (58,7 отсто) сметаат дека им се влошил квалитетот на живот во последната година, за 29,0 отсто останал ист, додека за 10,7 отсто се подобрил.
Сиромаштијата и невработеноста се најголемиот проблем за 30,0 отсто од граѓаните, а за една четвртина од нив (25,9 отсто) тоа е корупцијата и криминалот. Помал проблем за граѓаните е, како што покажа истражувањето, економската ситуација (13,9 отсто) и иселувањето на младите (13,5 отсто). Меѓутоа, граѓаните не се оптимисти кога е во прашање економијата на земјата. Повеќе од половината (55,1 отсто) сметаат дека економијата ќе се влоши во следните две години.
Нешто повеќе од половината (51,8 отсто) од испитаниците сметаат дека државата се движи во погрешна насока, додека за 16,8 отсто насоката е правилна. Мнозинство (61,7 отсто) се и оние кои сметаат дека во земјава нема политичката стабилност, за разлика од 35,2 отсто кои велат дека ја има.
Владата ужива доверба кај околу една третина од граѓаните, додека мнозинството (63,7 отсто) немаат доверба во неа. И покрај тоа, нема мнозински став за предвремени парламентарни избори.
Поделени се мислењата на граѓаните за тоа кој е најдобриот пат за земјата. За 36,3 отсто, потребни се предвремени парламентарни избори, додека за 30,4 отсто излезот е во целосната мобилизација за надминување на предизвиците и формирање широка коалиција на СДСМ и ВМРО-ДПМНЕ. Верба дека сегашната влада има сила и способност да продолжи и успешно да ја води земјата имаат 23,3 отсто од испитаниците. (Р.Н.)