„Земјоделските површини ни се поплавени, едвај ја вадиме зелката од нивите за да ја дадеме по 5 денари и тоа на сила, велат земјоделците од струмичкото село Добрејци. „Со таа цена не можеме да си ги платиме семенските материјали“.
Има и такви кои незадоволни од ниската цена ја оставаат зелката и по нивите. Вината ја гледаат во нелојалната конкуренција од страна на откупувачите кои според нив ја диктираат цената.
„Пазарот немаше никаков притисок за цената на зелката од 40 денари за една недела да падне на 5 денари“, вели за НОВА Ацо Стоилков, сопственик на фирмата „Максмоларски ној“ од Струмица.
Причината, како што вели, е во групацијата на извозници во струмичкиот регион кои придонеле да ја креираат судбината на 30 илјади земјоделци.
„Апелирам до Министерството за земјоделство и државните институции да се залагаат повеќе, зошто пазар за извоз на зелката има во европските земји и цената е се уште висока. Денеска ја откупуваме по 6 денари, за разлика од пред една недела пред изборите кога беше 13 денари“, вели Стоилков.
Тој вели дека од самиот старт постоело простор да се одржи висока цена која ќе го исплати и трудот на земјоделците, но, како што истакна, групација на неколку извозници во струмичкиот регион придонеле денеска зелката да се откупува по цена која не може да ги покрие ниту трошоците за семенските материјали.
Земјоделците кои денеска ја даваа зелката по цена од 5 денари велат никогаш немало ваква ситуација кога пролетната зелка сеуште нестасена се откупуваше по 15 денари, за веднаш после изборите да се откупува по 5 денари.