Жените во Шуто Оризари добија гинеколог. Од денеска во амбулантата која се наоѓа во Поликлиниката ќе прегледува Вјолце Нбиара, која работела во американската болница во Албанија. Нбиара денеска ги прими првите пациентки, кои по 10 години ќе добијат матичен гинеколог. Таа обајсни дека го учи македонскиот јазик, дека разбира, но за почеток комуникацијата со пациентите ќе се одвива со помош на медицинската сестра.
Министерството за здравство во заминување, Арбен Травари рече дека вработувањето на докторката Мбиара ќе биде трајно решение и со тоа ќе се реши долгогодишниот проблем со недостатокот од матичен гинеколог во Шуто Оризари.
Жените во Шуто оризари цела деценија немаа матичен гинеколог, не можеа да се лекуваат, немаше кој да им издава упати и рецепти. Амбулантата стоеше празна откако единствениот гинеколог си замина, а посетите два пати неделно од гинеколози во болницата во Чаир не го решија проблемот. Поради сиромаштија најголем процент од жените не беа во можност да одат на матичен гинеколог во другите населби.
Сето тоа влијаеше на зголемување на смртноста на доенчиња која кај ромската популација е најголема.
Анализите на Заводот за заштита на мајки и деца покажаа дека смртноста кај доенчињата кај ромската популација е највисока во однос на останатите во сите периоди почнувајќи од раѓање па се до 11 месец од животот.
Како причини стручњаците ги наведуваат социјалниот статус, необразованоста, тинејџерската бременост, неинформираноста, но една од главните причини е и недостапноста до матичен гинеколог.