Ревизија не се прави за четири дена, реагира градоначалникот на општина Центар Андреј Жерновски на изјавата на премиерот Груевски кој во јавноста јавно се запраша “зошто на Жерновски му се потребни шест месеци за ревизија за 40-тина набавки дали во недостаток на идеи што да работи прави ревизија на Скопје 2014”.
Жерновски, исто така, обзнани дека денеска испратил барање и до Државниот завод за ревизија за и тие да направат ревизија на набавките од проектот Скопје 2014.
„Одлично е ако Државниот завод тоа го направи за 4 денаџ Инаку, јас знам дека тие имаат годишна програма за работа, но постои и можност за дополнувања на таа програма и ако прифатат да прават ревизија би било навистина добро“, рече Жерновски.
Во врска со аферата „Галеника“, каде е уапсен директорот на Леарницата која леела и скулптури од проектот „Скопје 2014“, градоначалникот Андреј Жерновски, рече дека тој скандал тресе друга држава и затоа не сака да коментира, а се што се однесува за ревизијата, одговор може да се добие од Комисијата која ја формираше.