Градоначалникот на општина Центар, Андреј Жерновски, вчера на советничките прашања на Советот на општина Центар покажа записник од седница на ОК Центар на ВМРО – ДПМНЕ на која се договараат детали и се повикува на масовно присуство на протестот пред општина Центар во јуни, минатата година.
Ова, посочи Жерновски, јасно покажува дека ВМРО – ДПМНЕ е организатор на протестите. ВМРО – ДПМНЕ најавија тужба за клевета.
Советниците од ВМРО – ДПМНЕ можат да поднесат тужба каде што сакаат, ги упати Жерновски, бидејќи, како што рече тој, тие не само што се владеачка партија во оваа држава, туку таа партија е во судството, обвинителството и во секоја друга институција.
„За мене, најголем доказ беше изразот на ликовите на советниците кога го прочитав и им го покажав записникот. Сосема е јасно, преку паниката што настана е што се случува во редовите на ВМРО – ДПМНЕ. Денеска тие не се занимаваат со тоа дали ова е фалсификат и како ќе се прикаже како фалсификат, туку се занимаваат со тоа кој е кртот кој што ги дава овие информации. Не треба да се бара крт, затоа што јас вчера покажав десетици записници добиени од лица кои и покрај партиската задача, не се согласуваат во општина Центар да се прави вандализам. За тој вандализам треба да се одговара, ако оние што тврдат дека работат во согласност со Уставот и Законите навистина го прават тоа“, рече Жерновски.
Одговарајќи на новинарско прашање дали Жерновски ќе поднесе претставка до јавното обвинителство, Жерновски одговори дека него повеќе го интересира реакцијата на партискиот лидер, на МВР од каде што досега тврделе дека не знаат кој е организатор.
„Од овој документ јасно се гледа дека “Веритас“ не учествува како организатор. Да потсетам дека “Веритас“ не е регистрирана во Централниот регистар на РМ и не постои, а вчера видовме дека се работи за една организација која заедничко со “Веритас“ ја има само првата буква. Значи, не е “Веритас“ организатор на протестите, туку ВМРО – ДПМНЕ“, рече Жерновски.