Кои се ингеренциите на идниот градоначалник во Општина Центар во однос на Проектот 2014? Дали тој може промени нешто, да направи ревизија или да влијае на одлуките на извршната власт ?
Поранешниот градоначалник на Скопје, Трифун Костовски смета дека Андреј Жерновски како иден градоначалник на општина Центар, нема да може да направи ништо без Советот на Општината.
-Не гледам дека работите ќе се сменат бидејќи градоначалникот, сам не може да направи, ништо без советот. Доколку советот сепак, одлучи да се направи ревизија на спомениците во Општината, мислам дека владата ќе изнајде формула како работите наместо низ општина Центар, да поминат преку Собранието на градот Скопје изјави за НОВА Трифун Костовски.
Тој смета дека централната власт комплетно ја контролира локалната, ставајќи ја на колена и да зависи од неа.
Проектот 2014 е во завршна фаза. Правен е во време на светската економска криза и се претпоставува дека за негова реализација се потрошени над една милијарда евра, иако точната сума никој не кажува.
-Проектот е се подготвувал тајно, без знаење на граѓаните и на локалната власт, изјави Костовски кој од градоначалничкото место замина во април 2009-та, по што почна експанзија на новите споменици.
Поранешниот министер за култура Благоја Стефановски исто така се сомнева дека идниот градоначаник на Центар ќе може направи ревизија на проектот, а уште помалку да го стопира проектот.
-Во уметноста е изгубено чувството за мерка, а оваа општина е најоштетена. Доколку Жерновски како иден градоначалник успее да превземе некакви мерки, треба да го има во обзир и мислењето на граѓаните. Кога станува збор за некаква пренамена на објектите пак, тоа треба да се направи внимателно, со стручни и докажани луѓе вели Стефановски.