Градоначалникот на Општина Центар, Андреј Жерновски, денеска напладне ќе го објави почетокот на ревизијата на проектот „Скопје 2014“, соопшти неговиот кабинет.
Жерновски и за време на кампањата и веднаш откако започна со градоначалничката функција, најави ревизија на милионските суми за целиот проект Скопје 2014, склучени за време на владеењето на неговиот претходник, Владимир Тодоровиќ од ВМРО-ДПМНЕ.
Новото раководство на општина Центар, уште еднаш ја најави ревизијата и во врска со спорните локации спроти хотел „Бристол“ со дециден став- “Револтот на граѓаните е сосема оправдан. Ревизијата на Скопје 2014 ќе биде достапна до граѓаните!”
На првиот ден од мандатот, Жерновски најави стопирање на сите активности поврзани со проектот Скопје 2014, се додека не се констатира фактичката состојба. Градоначалникот на општина Центар Андреј Жерновски донесе одлука за мораториум за градбите и фирмите поврзани со овој мега проект.
“Денеска е издаден и налог до инспекциските служби да излезат на терен и да ги констатираат сите градежни активности што во моментов се спроведуваат, како и изградбата на новото седиште на ВМРО-ДППМНЕ, фасадата на зградата на Владата. Сето ова со цел да се утврди евентуална инволвираност на поранешното раководство на општина Центар во издавањето на градежните дозволи.
Се што се прави последните денови ме потсетува на времето на кога ЈНА изнесуваше се што можеше од државата. Јас дадов налог да се посетат сите места каде што се изведуваат работите и за се ќе биде информирана јавноста” изјави Жерновски на крајот на април, на првиот ден од мандатот.