Градоначалникот на општина Центар, Андреј Жерновски поднесе кривична пријава против Никола Груевски, претседателот на Владата на Македонија.
– Поднесувам кривична пријава против Никола Груевски кој е поттикнувач и организатор на насилството во општина Центар. Никола јас не сум кукавица како тебе. Кукавиците организираат други луѓе. Ќе те почитував ако лично дојдеше да ми удриш 5-6 шамари, рече на прес конференција пред Владата градоначалникот на Центар.
Тој му порача на Груевски дека кривично ќе одговара, и како што рече, ако не со неговите судии, сепак еден ден ќе одговара.
Жерновски посочи дека неговите деца често го прашувале како може премиер да нарачува напад врз градоначалник.
– Е па таков премиер имаме, рече Жерновски.
Никола Груевски, стои во пријавата, во разговор со лицето Миле Јанакиески, актуелен министер за транспорт и врски, го презентира планот за извршување на кривичното дело.
Тој, се вели понатаму во пријатава, најавува дека ќе се соберат околу две илјади луѓе пред општина Центар на 07.06.2013-та, од кои една група треба да влезе внатре и да го изврши насилството. Сугерира и физички напад врз Жерновски, на кого треба да му бидат удрени едно „пет-шест јаки шамари“. Никола Груевски, стои во кривичната пријава, дополнително го поттикнува физичкиот напад врз градоначалникот, со уверување дека напаѓачот нема да одговара кривично, бидејќи Жерновски не би се здобил со тешки телесни повреди.