„Оваа година нема да започне изградбата на основно училиште во Капиштец зошто касата е празна. Но сакам јасно да кажам дека средствата за училишта и градинки нема да се пренаменуваат за други цели. Добивме предупредување дека мора да се платат заостанатите сметки за парно, инаку училиштата ќе бидат исклучени од системот за греење“, изјави Жерновски.
Реакцијата на Жерновски уследи откако Томислав Лазаров, координатор на советничката група на ВМРО ДПМНЕ во Советот на општина Центар, денеска обвини дека парите за градинка и училиште Жерновски ќе ги користи за партиски вработувања.
Реакциите од ВМРО – ДПМНЕ не запираат: Андреј Жерновски стана градоначалник не за да наоѓа изговори, туку да решава проблеми. Жерновски не ја кажува вистината кога говори дека нема пари во буџетот на Општина Центар. Тој не предлага намалување на средствата, туку нивно пренасочување. Пари во буџетот има и тие се веќе предвидени за изградба на градинка и училиште, велат од владеачката партија.