Градоначалникот на Општина Центар, Андреј Жерновски денеска пред новинарите го образложи она што тој и неговата администрација го сработила изминатите четири години.
Жерновски оистакна дека изминатите неколку години работеле под притисоци и под опструкции од институциите на власта и дека општината Центар им била прво свратувалиште на финансиските инспектори. Тој истакна дека планира да се кандидира за втор мандат како градоначалник во Општина Центар, или со поддршка од СДСМ или пак како независен кандидат.
„Особено сум горд на новата градинка по цели 42 години и новото основно училиште по 47 години на територијата на нашата општина.Правевме реконструкции на градинки и училишта. Воведовме награди за најдобрите ученици, а родителите ги ослободивме од давачките за обезбедување, еднодневни ексурзии, часови по физичко и англиски јазик. Обновивме и посадивме зеленило на површина од 78.000 метри квадратни. Направивме нови паркови, засадивме 283 дрвја и многу други садници.Изградивме и 10 нови детски игралишта“, рече Жерновски.
Тој додаде дека реконструирале улици со површина од 52.000 метри квадратни, како и нова атмосферска, водоводна и канализациона мрежа.
„Посветивме две улици на боемите, изградивме четири нови сквера и обновивме фасади на 13 згради со енергетска ефикасност и четири пензионерски клубови. Преку референдум се изборивме за зачувување на автентичноста на ГТЦ, ја спречивме изградбата на Шпанските скали и направивме ревизија на контроверзниот проект Скопје 2014“, истакна градоначалникот на единствената скопска општина која беше водена од опозиционер.
Жерновски рече дека сето ова го направиле без никаква подршка и помош од владата, како и дека само во првите неколку месеци во Општината влегле три пати повеќе инспектори, отколку што влегле за целиот мандат на Тодоровиќ. Тој додаде дека наследиле празна буџетска каса поради што во прашање биле доведени и платите на вработените.Жерновски им заблгодари на неговите вработени кои како што рече вложиле огромен труд за успешно да се реализираат сите зацртани проекти.