Промените во законот за градење се насочени само кон општина Центар, а со ова сакаат да се отстранат сите препреки на патот кон барокот, кој сака целосно да се инсталира во општина Центар, рече денеска пред новинарите градоначалникот на Центар, Андреј Жерновски откако вчера беше најавено дека неговата семејна куќа е еден од 19-те објекти за кои Градот Скопје објави тендер во кој бара идејно решение за нов изглед.
Жерновски вели тоа се должи бидејќи неговата општина најавила дека нема да дозволи нова барокна фасада на ГТЦ и на околните објекти, и очигледно преку одземање на ингеренциите ќе се направи замисленото.
„Владата ликува дека фасадата на мојата семејна зграда ќе биде во барок. Ова покажува до каде може да оди лудилото. Оваа одлука на Владата е лична и насочена кон мене. Во дилема сме со семејството како да одговориме на лудилото“, изјави Жерновски.
Посочи дека ингеренциите се одземаат противуставно, но Жерновски не ни мислел дека дотаму власта ќе сака да ја форсира моќта, па за главните работи во општина Центар да одлучува Град Скопје.
„Ова не е поради некакви несогласувања помеѓ у Центар и градот, бидејќи советниците на ВМРО – ДПМНЕ во Скопје, како и овие во Центар се обични послушници и затоа јас не им се лутам“, рече тој.
Жерновски тврди дека според важечката регулатива и ДУП-от не е можна реконструкција на фасадата на ГТЦ, и псоочи дека некои мнозинството го користат за поодговорно владеење, а некому, како на актуелната централна власт, му служи за злоупотреба.