Комисијата за образование, наука и спорт и понатаму е заглавена на Деловникот за работа. Пратениците меѓусебно се обвинуваат за кочење на работата.
Координаторот на Пратеничката група на СДСМ, Горан Сугарески денеска повторно ја обвини претседателката на Комисијата, Олга Најденовска за кршење на Деловникот и Уставот и дека реализирала сценарија за предизвикување физички инцидент. Тој од неа и од собраниските правници побара да дадат стручно толкување на Деловникот во делот на ограничувања на дискусијата, која е тензична тема изминативе седници.
Според него, Најденовска неисправно раководи со Комисијата и побара на Дневен ред на Собранието да се стави интерпелација на Најденовска.
На тоа реплицираше координаторот на ВМРО-ДПМНЕ, Илија Димовски кој рече дека функцијата претседател на комисија не е јавна функција, за разлика од пратеник, и не може да се бара нејзина оставка од Комисијата.
Според Димовски, однесувањето на опозицијата е со цел да се блокира носењето на законот за изградба на универзитет „Дамјан Груев“ а за да го оствари тоа, според него, опозицијата ги злоупотребува сите механизми и се однесувала насилно.
Сугарески на ова реплицираше дека Деловникот за работа е донесен во 2013 година од страна на ВМРО-ДПМНЕ и со него е предвидено ограничување на дискусијата само на Комисијата за финансии, за економски прашања и за услогласување на регулативата на ЕУ, но не и на Комисијата за образование.
Најтензично беше кога заменик-координаторка на опозицијата, Соња Мираковска се обраќаше процедурално, а претседателката Олга Најденовска се обиде да ја почне амандманската расправа, па дури почна да ги чита и амандманите.
По жестоката расправа, таа ја прекине седницата и даде пауза од половина час.