Жители на Арачиново, во придружба на градоначалникот Ридван Ибраими, денеска протестираа пред објектот на ЕВН во Бутел. Причина е што поголем дел од Општината веќе трет ден е без напојување со електрична енергија по големиот дефект што се случи во понеделникот, како последица на диви приклучоци во мрежата и оптоварување на трансформаторите.
„Неприфатливо е овие граѓани да се соочуваат со голема неправда. Континуирано ја следиме состојбата. Не знам која е целта и кому му одговара ситуацијата да ескалира. Неприфатливо е нехуманото однесување на компанијата. Обврска на ЕВН е да преземе итни мерки и да воспостави ред, како и во сите други општини. Само отоа бараме. Ништо повеќе“, изјави на протестот Ибраими.
Арачиновци ѝ забележуваат на компанијата дека е неажурна за решавање на проблемот и инсистираат на отстранување на дефектот. Од компанијата, пак, возвратија дека во моментот е небезбедно да испратат екипи на терен, бидејќи нејзини вработени биле постојано мета на физички и вербални напади од локални жители.
„Просечните годишни загуби во Општина Арачиново се околу 20.000 мегават часови на електрична енергија поради нелегални приклучоци. Преведено во пари, тоа се шест милиони евра“, соопштија од ЕВН.
Со реакција околу ситуацијата со струја во Арачиново се јави и народниот правобранител кој побара од Министерството за внатрешни работи да обезбеди безбедни услови за екипите на ЕВН во насока на што поскоро санирање на дефектот. Од канцеларијата на народниот правобранител информираат дека група граѓани поднеле претставка, бидејќи не можеле да одржуваат личн хигиена, и покрај тоа што биле редовни плаќачи.