Претставници на Професорскиот пленум во моментов се пред Ректоратот на УКИМ каде што даваат поддршка за студентската блокада на Ректоратот која се случува од 8 часот утринава.

Студенти од повеќе младински организации и Пленумот веќе два часа со блокиран влез на Ректоратот бараат седницата на Сенатот да се одложи се додека не се изберат легитимни студентски претставници.

Тие велат дека со 10-те студентски гласа, денешниот избор на нов ректор ќе биде нелигитимен, бидејќи студентските претставници во Сенатот се со истечени мандати.

Ова тврдење на студентите го поддржува и Професорскиот пленум кој смета дека настаната е правна хаварија и дека Ректорот е должен да ја одложи седницата се додека не се изберат легални студентски претставници.

profesori

Ситуацијата пред Ректоратот е мирна, студентите со жив ѕид го блокираат влезот а до нив се и професорите, додека кандидатите за сенатори придружувани од актуелниот ректор Велимир Стојковски набљудуваат од страна.

Прв кој направи обид утринава да влезе во Ректоратот беше Стојковски кој по излагањето на студентите на нивните барања, се повлече настрана. Стојковски денешната акција ја оцени како глупост и вели дека не смее да се дозволи Универзитетот да функционира без Сенат.

Тој вели дека изборот на ректор е само една од точките на дневен ред но исто толку важно е и Сенатот да изврши избор на професори, а на дневен ред се и научно-истражувачки проекти. Според него се навлегува во сериозен правен проблем.

Освен Стојковски и неколкумина членови на Сенатот во неколку наврати влегоа во расправија со студентите барајќи да влезат во Ректоратот.

Проф. Ненад Новковски
Проф. Ненад Новковски

Громогласен аплауз со негодување  доби и еден од кандидатите за ректор, Ненад Новковски, кој од студентите побара да му овозможат да влезе со цел да се одржи седница на која тој би бил избран за нов ректор и со тоа би ја вратил автономијата на Универзитетот.

Новковски им рече на студентите дека не можат да го блокираат влезот за професорите бидејќи тие се автономни, по што наиде на бурни реакции од студентите кои му порачаа дека како иден ректор тој би требало да застане рамо до рамо со нив.

Во потесен круг за ректор се универзитетските професори Никола Јанкуловски и Ненад Новковски.