41 годишниот Исмет Хаџиу нема срце, извадено му е. Наместо тоа во неговите гради чука вештачко срце, (од пластика) која е времена замена за срце. Тој е единствениот жив пациент на кого му е направена оваа сложена операција пред една година, тука во државата. Живее приклучен на батерии или струја, со придружна опрема тешка 7 килограми, додека не се отвори можноста за трансплантација на срце. Чукањето на машината е присутно постојано, кога спие, се движи, се бања. Се слуша постојано и додека го водевме разговорот во студиото на НОВА.
И 31 годишниот Кристијан Неделковски, живее приклучен на батерии. Тој е првиот пациент на кој пред 8 години му се вградени две пумпи во Берлин. На овие двајца млади луѓе, им е неопходна трансплантАција на срце, за што во моментот очигледно се уште не се создадени услови, донори нема. Тие направија напор и дојдоа во студиото на НОВА, да проговорат како е да се живее без срце, со поддршка на овие апарати, кои имаат ограничен рок на траење, за стравот низ кој поминуваат доколку откаже апаратот, за трансплантацијата која им е итна и неопходна. Трансплантацијата чини три пати помалку, од вештачкото срце и вградувањето на пумпи.
Во државата во моментот има 23 луѓе на кои им е неопходна трансплантација на срце, половина од нив немаат никаква вештачка поддршка во работењето на срцето. Кампања од Министерството за здравство, за подигнување на свеста за дарување на органи се уште нема. Во ПРОЦЕС, покрај овие двајца млади луѓе зборува и Зоран Неделковски, татко на Кристијан.