Контролите кои членови на Златна зора нелегално им ги вршеа на македонските граѓани на грчко-македонската граница се дел од документацијата за проблематичните активности на партијата кои се во раце на Врховниот суд, јавува дописникот на „Утрински весник“ од Атина. Според пишувањата на „Утрински весник“, грчкиот весник “Катимерини” јавува дека солунското обвинителство одговорно за регионот на северна и централна Грција доставило 11 предмети во документацијата за „Златна зора“ до Врховниот суд, а еден од нив се однесува на контролите кои ги вршеа членовите на ултра десничарската партија на граничните премини меѓу Грција и Македонија. Во пренесениот текст од грчкиот весник „Катамарини“” се вели дека “активистите на „Златна зора“ на границата ги “заменуваа” граничарите и вршеа контрола на патниците од ФИРОМ кон Грција. Со узурпирање на власта ги вадеа табличките на автомобилите кои ја имаат кратенката МК, активност која создаде анти-грлка клима во ФИРОМ и лоша слика за Грција во странство”, пишува „Катимерини“
Врховниот суд има 32 случаи против партијата, а ќе го истражува и мешањето на Златна зора во работата на грчката гранична полиција и царина и контролата дали се лепат налепници со ознаката ФИРОМ врз новите регистарски таблички на македонски возила.
Утрово грчката полиција го уапси лидерот на „Златна Зора“ Никос Михалолиакос, пратениците Илијас Касидиарис, Илијас Панајотарос, познат по нападот и малтретирањето на македонски камионџија, Никос Михос и Јанис Лагос, а за сега се уште се трага по пратеникот Христос Папас за кој има налог за апсење, јавува „Утрински весник“.
Симпатизерите на Златна зора во моментов се пред генералниот штаб на полицијата во Атина во знак на протест против апсењата.