Здружението на новинари на Македонија (ЗНМ) и Самостојниот синдикат на новинари и медиумски работници (ССНМ) најстрого го осудуваат предлогот на владејачката партија ВМРО-ДПМНЕ во поглед на медиумите а кој е предмет на разговор помеѓу работните групи со посредникот Питер Ванхауте.
Како што велат претседателот на ЗНМ, Насер Селмани и претседателката на ССНМ, Тамара Чаусидис, законот кој го предлага ВМРО-ДПМНЕ за владините реклами е брутален напад врз независноста на медиумите, а со него се прави упад врз мисијата, финансирањето и уредувачката политика на медиумите.
– Вистинската цел на кампањите е медиумите да ги заборават граѓаните, јавниот интерес и демократијата, и да бидат огласна табла за фалење на владините политики, изјави Селмани.
Тој потенцира дека ВМРО-ДПМНЕ за јавен интерес ја прогласува секоја активност на Владата и на јавните институции, тековни и идни активности на Владата, што во превод значи со јавни пари да продолжи и да ја засили промоцијата на партиската програма.
– Со овој закон, власта со парите на граѓаните планира да ја легализира, прошири и надгради корупцијата во медиумите со цел да ги контролира и да ја задуши секоја критика во медиумите, дополни првиот човек на ЗНМ.
>> Фридом Хаус: Надолен тренд во однос на слободите во Македонија
Тамара Чаусидис, образложи дека ставовите на ЗНМ и ССНМ се исти, односно дека тие целосно стојат позади предлозите на беглискиот посредник во преговорите, Питер Ванхауте, а воедно, смета дека е апсурдно што воопшто сериозно се дискутира за предлозите на ВМРО-ДПМНЕ кои не нудат департизација кај медиумите туку дополнителна контрола.
– Жално е што воопшто доаѓаме до ситуација вакви апсурдни и небулозни предлози да мораме да ги разгледуваме како сериозни. Можни се две објаснувања, или станува збор за купување време и да остане статус-кво за да се спречат системските промени кои ги предлага посредникот Ванхауте, или станува збор за лов во матно во ова ненормално време да се протнат практиките кои веќе ги имаме во медиумската сфера во кои жртвата е слободата на изразувањето, рече Чаусидис.
>> Предлозите на ВМРО ДПМНЕ за медиумите спротивни на препораките на Прибе
Селмани и Чаусидис побараа од СДСМ, ДУИ, ДПА, ЕУ и САД категорично да го отфрлат предлогот на ВМРО-ДПМНЕ и одлучно да се заложат за предлозите на Ванхауте. Тие сметаат дека јавниот интерес за партијата на власт претставува само партиски интерес.
Првите луѓе на ЗНМ и ССНМ го критикуваат и предлогот на ВМРО ДПМНЕ за поставување партиски уредници во Јавниот сервис, кој наиде на жестоки реакции и во еснафската јавност.