Здружението на новинарите на Македонија денеска изрази жалење за смртта на новинарот и сопственик на весникот „Фокус“, Никола Младенов, кој загина во сообраќајна несреќа во близина на скопската населба Хиподром.
– Прераното заминување на Младенов не е само голема загуба за неговото семејство и неговите пријатели, туку претставува огромна загуба и за сите македонски новинари. Изгубивме колега, кој остана верен на неговите читатели и критичен на секоја власт. Вакви новинари се ретки и затоа загубата е огромна. Никола беше и останува светла точка на македонското новинарство, од кого ќе можат да учат иднините генерации новинари, се вели во соопштението од ЗНМ.
Никола Младенов (1964-2013) ја почна својата кариера во Млад Борец пред 20 години. Во 1995 го основа неделникот Фокус, а 16 години подоцна издаде и дневен весник. Секогаш со критички анализи кон случувањата по Република Македонија од нејзиното осамостојување до денеска.