Здружението на новинарите на Македонија реагира на изјавите на премиерот Зоран Заев од последното интервју објавено во неделникот „Фокус“, а во врска со документарниот серијал „Редакција“ и првата епизода насловена како „Заговор против воздухот“ на Истражувачката репортерска лабораторија (ИРЛ).
Реакцијата на Здружението се однесува на изјавата на премиерот кој во одговор на новинарско прашање вели дека „треба да се праша и втората страна.. ред е да го прашате ФЕНИ или некој друг што е споменат од корисниците на мазутот… не ги гледам двете страни во документарецот“.
„Ваквиот јавен став и коментар од страна на Претседателот на Владата и Претседател на партијата на власт, поврзан со истражувачката работа на новинарите може да поттикне сомнеж во кредибилноста на работата на нашите колеги, а со тоа и да се влијае на ограничување на слободата на изразувањето. Од премиерот Заев се очекува да ги охрабри истражувачките новинари во нивните напори да откриваат евентуална злоупотреба на институциите како механизам за спречување на корупцијата, а потоа да реагираат и органите на прогонот“, велат од ЗНМ.
Од Здружението алармираат дека вакви ставови за работата на новинарите од страна на високи владини и партиски претставници може да создадат ,,ефект на ладење”, а со тоа да се одвратат новинарите да работат на теми поврзани со корупција и злоупотреба на власт и додаваат дека околу етичноста на новинарските стории треба да одлучуваат саморегулативните тела.