Досегашниот потпретседател на СДСМ и трикратниот градоначалник на Струмица, Зоран Заев е избран за лидер на најголемата опоцизиска партија во земјава во првиот круг од тајното гласање на 14-иот Конгрес со 395 гласови. Негови противкандидати беа Зоран Јовановски, кој доби 137 гласови и Кире Наумов, кој доби 15 гласови.
Заев како нов претседател на СДСМ се обрати пред Конгресот:
– Вечерва не победи никој од кандидатите, туку СДСМ. Одржавме лекција по демократија на начинот на кој ги спроведовме изборите. Апелирам на единство, да бидеме нашата стегната тупаница, зашто само така ќе го победиме режимот на Груевски – истакна тој.
Делегатите со френетичен аплауз го поздравија новиот лидер, а освен тоа му ја подарија Ладата на Отпорот на Бранко Црвенковски, досегашниот лидер на СДСМ.
Главен сојузник и десна рака на Заев во водењето на партијата треба да биде кандидатот за премиер на претходните парламентарни избори, Радмила Шеќеринска, која, како и Заев, е искусен инсајдер во СДСМ.
Победата на Заев не е неочекувана со оглед на тоа што тој во периодот пред Конгресот се сметаше за фаворит и сега од овој двоец се очекува да изгради ново единство и програма со која треба да се порази актуелната власт, да се надминат евентуалните поделби и да се допре до гласачите на начин кој ќе биде поискрен и попристапен од актуелните политики на власта.
Заев е роден во 1974 година во Струмица, оженет е и татко е на две деца. Професионалната кариера ја почнува во 1997 година во деловните кругови во својот роден град се до 2003 година кога станува пратеник во Собранието на Република Македонија. Градоначалник на Струмица е од 2005 година, а повторно победи на локалните избори и во 2009 и во 2013 година.
Во однос на партиската кариера, член е на СДСМ од 1996 година и оттогаш активно учествува во сите изборни циклуси. На парламентарните избори во 2006 година е назначен за шеф на Регионалниот изборен штаб за 4-та изборна единица. Во два мандати е избран за член на претседателството на ОО на СДСМ Струмица.
Во 2006 година е избран за потпретседател на СДСМ, а оваа функција ја врши до 2008 година кога е избран за в.д. претседател на Партијата. На IX-тиот Конгрес на партијата повторно е избран за потпретседател на Централниот одбор на СДСМ.