Зошто ова е критична недела за постигнување мир во Украина?

Зеленски минатата недела рече дека Украина не може да прифати признавање на Крим како руска територија, откако Трамп го обвини дека е непопустлив по ова прашање. Тој инсистираше во тоа време дека територијата е „сопственост на украинскиот народ“.

Од друга страна, според рускиот министер за надворешни работи Сергеј Лавров, Русија не разговара за статусот на Крим како дел од преговорите со Соединетите Американски Држави за прекин на војната во Украина.„Тоа е решено прашање. Русија не преговара за интегритетот на својата територија“, изјави тој за CBS News.                                                                                                                                            Според Лавров, Трамп го разбира тоа. Во исто време, рускиот министер го критикуваше претседателот Зеленски и неговата непопустливост по прашањето за сопственоста на полуостровот.

Државниот секретар на САД, Марко Рубио, изјави за NBC дека претстојната недела може да биде „многу критична“ за напорите за завршување на војната во Украина, бидејќи претседателот Трамп врши притисок врз Москва и Киев да постигнат договор.                                                                                                „Блиску сме, но не доволно блиску“, изјави Рубио за NBC, додавајќи дека „ова ќе биде многу критична недела“.

„Мора да одлучиме дали ова е потфат во кој сакаме да продолжиме да се вклучуваме или дали е време да се фокусираме на други прашања кои се подеднакво, ако не и повеќе важни, во некои случаи“, рече Рубио.

Тој рече дека сè уште има причини за оптимизам, но и причини да се биде реалистиен во врска со шансите за постигнување договор за прекин на конфликтот што започна со руската инвазија во февруари 2022 година.

Два документи за мировен план објавени од Ројтерс минатата недела  покажуваат дека Соединетите Држави предлагаат Москва да ги задржи териториите што ги зазеде, вклучувајќи го и стратешки важниот полуостров Крим.

И покрај неговите коментари за Крим, американскиот претседател изрази нова симпатија кон својот украински колега во неделата, велејќи дека „сака да направи нешто добро за својата земја“ и „работи напорно за да го направи тоа“.

Во врска со неговиот разговор со украинскиот претседател, Трамп рече дека е „изненаден и многу разочаран“ што Русија ја бомбардираше Украина по разговорите меѓу рускиот претседател Владимир Путин и мировниот претставник на Трамп, Стив Виткоф.

„Бев многу разочаран што ракетите летаа, руски ракети“, рече американскиот претседател.

Кога новинарите го прашаа што сака Путин да направи, Трамп одговори: „Па, сакам да престане да пука. Да седне и да потпише договор. Верувам дека имаме рамковен договор и сакам да го потпише и да го заврши.“                                                                                                                                                        Трамп, исто така, рече дека неговиот однос со Зеленски се подобрил по состанокот во Ватикан.

„Видете, нашиот однос никогаш не бил лош. Имавме мала расправија затоа што не се согласував со нешто што го кажа, а камерите баш то го снимаа , и за мене тоа беше во ред. Знаете, тој е во тешка ситуација, многу тешка ситуација. Тој се соочува со многу посилна сила“, рече Трамп.

Споредувајќи го Зеленски со кого се сретна во Ватикан со оној со кого се соочи во Овалната соба во февруари, Трамп рече дека „изгледал посмирен“ и сметал дека „имал подобро разбирање на ситуацијата и покажал  подготвеност  да склучи договор“.