Група граѓанки препладнево се обиделе да го отстранат шаренилото од Порта Македонија, објект кој заедно со останатите споменици на Скопје 2014 е мета на антивладините демонстранти на Шарената Револуција.
Обезбедувањето на Порта Македонија ги спречило во намера за, како што велат, да не направат уште поголема штета на објектот.
-Мермерот е специфичен материјал, кој бара посебен начин на чистење со специјални средства. Вака може да се направи полошо, бидејќи бојата ќе се впие уште повеќе. Значи, се чисти со специјални хемикалии кои ние ги користиме, додека граѓаните се обиделе со обични детегренти, што е погрешно и може да се нанесе дополнителна штета, објаснуваат од Порта Македонија за НОВА.
Локалните таксисти кои сведочеле на настанот раскажуваат дека жените организирано со канчиња вода, детегренти, крпи и жици се обиделе да го исчистат објектот. По реакцијата на обезбедување, тие групно ја напуштиле локацијата.
Граѓанките тврдат дека акцијата е нивна идеја.
Спомениците се зафатени од Шарената револуција, поради револтот на демонстрантите од погрешните политики на власта и, како што велат тие претераното трошење за проектот Скопје 2014.