Од:

Груевски е гневен што нема решение со кое ќе го заклучи СЈО

Треба да се запрашаме кому би му послужил граѓански конфликт – на Груевски или на земјата? Одговорите се многу едноставни – ова е приказна за спасувачка мисија на еден гневен политичар. 

Пишува: Борјан Јовановски

Никола Груевски не може да формира влада која ќе ја исполни неговата основна цел – ставањето клуч на вратата на СЈО и суд кој ќе остане под негова контрола. Секому му е јасно дека ова е невозможна мисија без разлика кој и како ќе составува влада. И ова Груевски го знае.  И токму ова е единствената причина за неговиот гнев. Во позицијата во која се наоѓа нему му преостанува уште една карта со која би можел да се спаси, а тоа е подигање на тензиите до ниво на граѓански конфликт во кој тој ја има контролата.

Само така Груевски може да има преговарачка позиција која евентуално би му обезбедила ескивирање од неминовинте процеси на реетаблирање на владеењето на правото во државата. Прашањето кое се поставува е дали сите ние, цела Македонија, Македонци, Албанци, Турци, Роми, Срби и сите други, ќе го ставиме во залог она што ни е најсвето – Македонија, за интересот на Груевски и мала група на луѓе околу него засегнати од работата на СЈО.

На Македонија како никогаш досега и треба единство и обединување околу најпатриотската кауза- мирна, стабилна, праведна и европска Македонија. ВМРО ДПМНЕ е голема партија и важен политички субјект на македонската политичка сцена. Во и околу таа партија има вредни и чесни луѓе. Време е ВМРО ДПМНЕ да ја одигра својата историска улога содржана во нејзиниот наслов. Партија за македонско национално единство. На Македонија и треба широк консензус демонстриран во Собранието кој ќе застане цврсто зад Влада со единствена платформа да ги спроведе што поскоро , во најкус можен рок ургентните реформи од кои зависи нашата европска перспектива и нужната стабилност.

Во националното единство е потребно ВМРО ДПМНЕ кое оваа своја историска улога може да ја одигра само и само ако се ослободи од луѓето кои ја узурпираат и компромитираат каузата на оваа партија. Време е во партиските тела да се отвараат вратите за демократијата и да се побара оставка од актуелното раководство. На тој начин не само што ВМРО ДПМНЕ ќе ги отвори пристапите кон неа од сите страни и партии како клучен партнер во креирањето на иднината на Македонија. Воедно, тоа е единствениот лек партијата да се ослободи од сите грди слики налепени на неа, а кои произлегоа од прислушуваните разговори. Конечно, ако некој победи на овие избори тоа е визијата на речиси сите полтички партии за продолжување на мандатот на СЈО и формирање на специјален суд. СДСМ, ДУИ, БЕСА, ДПА и Алијансата, сите застана зад ова. Тука може да се додаат и сите скоро над 50.000 гласови на партиите како ВМРО-НАРОДНА, ЛЕВИЦА, ЛП и други кои завршија без да се ефектуираат во пратенички мандати. Тоа е јасно изразена волја на огромно мнозинство на граѓани од сите етнички групи.

Да се оди против таа изразена волја е отворање на врати за нова уште подлабока политичка, но и безбедносна криза. Широк консензус за подршка на експертска влада која ќе му го расчисти патот на СЈО да ги реализира сите процеси во рамките на основните принципи на владеењто на правото конечно е и опција самиот Груевски и неговата екипа во фер судски процес да докажат дека се невини како што тврдат и со тоа да си го повратат лидерското место во партијата. Но и обратно, ако не успеат да ги отфрлат обвиненијата да си ја превземаат моралната и законска одговорност. Секое друго сценарио, особено ова кое се развива во моментов, значи смрт за Македонија и дефинитивен пораз на идеалите на нашата и сите минати генерации Македонци.