Штрајкот на просветарите продолжува и денеска во сè поголем број, додека во неколку училишта министерството за образование веќе почна да филтрира заменски наставници на местото на оние кои штрајкуваат, велат од СОНК за НОВА.
Прекинот на наставата започна вчера, а денеска приклучени се уште три училишта во Скопје. Најмасовно е во Полошкиот регион, каде 90 отсто од членството на СОНК вчера стапи во штрајк. Се штрајкува и во Куманово и Струмица, а во Струга сите основни и средни училишта не држат настава.
Од ресорното министерство сè уште нема одговор на барањето за минимална плата, како и укинувањето на казните за наставниците поради екстерното тестирање и за другите прашања кои СОНК ги покрена уште во септември.
Претседателот на СОНК Јаким Неделков вели дека просветарите се соочуваат со постојани притисоци и според реториката на надлежните, целта е да се растури СОНК како организација.
-Штрајкот на просветарите зема се поголем замав и жалам што одредени медиуми воопшто не одвојуваат време да известуваат за оваа тема. Ние немаме никаква комуникација со власта , бидејќи очигледно е дека не покажуваат никакво разбирање за нашите барања. Нивната цел е задушување на штрајкот, но освен тоа, се намерачиле и за целосно растурање на СОНК, вели Неделков за НОВА.
На само неколку дена пред најавениот генерален штрајк, група наставници излегоа со барање да не се поддржува прекинот на наставата.
– Видовме дека излегуваат наставници на прес-конференции и читаат од листови што треба да кажат. Не знам од каде е задоволството да се прави тоа на сметка на просветарите кои навистина се соочуваат со проблеми. Овие контра-штрајкувачи покажуваат само колку може да бидат ниски во својата свест, вели Неделков.
Неделков потенцираше дека и покрај притисоците штрајкот нема да прекине сè додека не се остварат барањата на наставниците.
СОНК доби поддршка и од Европската конфедерација на синдикатите за образование.