Денеска се навршуваат 110 години од смртта на големиот македонски револуционер и визионер Гоце Делчев.
Државни и градски делегации положија цвеќиња на неговиот гроб во црквата Св. Спас и на спомениците на Плоштадот Македонија и во Градскиот парк.
Гоце Делчев беше убиен на 4 мај 1903 година, во борба со турската војска во селото Баница, на пат кон Сер.
Целта на неговото последно патување била намерата да го спречи или одложи предвременото востание, кое во тие денови (2 до 7 мај) се договарало на Смилевскиот конгрес.
Роден е на 4 февруари 1872 година во Кукуш, а се школувал во гимназијата во Солун и на Воената академија во Софија.
Учителствувал во Штип, а како член на Централниот комитет на ТМОРО работел на создавање мрежа на бази, комитети и комитски чети на Организацијата.