Најмалку 12 жртви однесоа поплавите во Тбилиси во Грузија по невремето кое го зафати главниот град на земјата.
Тбилиси минатата вечер го погоди невреме со град и силни ветрови по што потопени се неколку куќи и згради а оштетен е голем дел од инфраструктурата.
Од врнежите се излеала и реката Вера со што поплавите навлегле во зоолошката градина во грузискиот главен град. Неколку животни се удавиле а побегнале во градот неколку тигри и мечки, јавуваат светските агенции.
Покрената е потрага по 32 диви животни а градските власти ги алармираа жителите да не излегуваат од своите домови додека не бидат пронајдени животните.
– Се трага по шест лавови и тигри, седум мечки и 13 волка, соопшти еден од градските претставници.
Иракли Гарибашвили, премиерот на земјата потенцираше дека состојбата е алармантна но дека тие имаат контрола врз случувањата.