Жители од гевгелиските села Стојаково, Богородица и Селемлија се заразиле од бактеријата ешерихија коли. Дури 120 луѓе побарале медицинска помош поради болки во стомакот.
Водата од водоводниот систем во овие три села е забранета за пиење.
„Од 120 лица кои тогаш побарале лекарска помош, а гравитираат кон овие три села, 38 биле препратени во Гевгелиската Болница со средно и тешка симптоматологија , девет биле задржани, а две лица се уште се хоспитализирани. Тие се жалале на интензивно повраќање, гадење, болки во стомакот, течни столици со интензитетот во првите часови од 5-6 столици и опасност од дехидрација“, вели д-р Сашко Олумчев, епидемиолог и раководител на подрачна единица на Центарот за јавно здравје Велес-Гевгелија.
Центарот за Јавно здравје Велес утврдил дека жителите од трите села се заразиле од водата во заедничкиот водовод, по што веднаш е наложено да се хиперхлорира водата за пиење.
„Констатиравме дека на 25-ти август дошло до дефект на главниот цевковод кој ги снабдува овие три села од пумпната станица ‘Вардар’. Земени се мостри пред и по него, како и мостри од пациенти на преглед во Итната медицинска помош. Истражувањата покажаа дека во водата во Стојаково и во Селемлија нема резидуален хлор, а во водата во село Богородица имало хлор. Утврдено е присуство на колиформни бактерии со висок титар, односно присуство на бактерија од фекално потекло-ешерихија коли“, образложи денеска Тони Димитриев в.д. директор на Центарот за јавно здравје Велес .
Високи количини од бактеријата ешерихија коли во водата за пиење во Стојаково е утврдено и во испитувањата што Центарот за јавно здравје Велес.
Во тек се анализите од мострите на водата за пиење земени вчера.