Изборната кампања денеска влезе во 13 ден. Партиите ги продолжија предизборните собири, митинзи и средби со граѓаните.
СДСМ и коалицијата денеска одржа предизборен митинг во Ресен.
– Очекувам од вас да покажеме дека не сме како нив, веќе градиме нов живот во Македонија, поразлични сме и ќе го покажеме тоа, затоа подајте ми ја својата рака, да се сплотиме, и да бидеме заедно во оваа борба, порача лидерот на СДСМ, Зоран Заев.
Тој ја претстави главната цел на програмата „План за живот во Македонија“ – враќање на парите кај граѓаните и обезбедување достоинствен живот за сите.
Од Ресен Заев порача дека новата влада на СДСМ ќе го укине екстерното тестирање.
Претседателот на ДУИ Али Амети денеска беше на средба со пензионерите во скопската општина Чаир, од каде порача дека ДУИ е сигурен победник на изборите на 11 декември.
-Ги повикуваме сите оние што имаат дилема, нека се приклучат на ДУИ затоа што ДУИ е сигурен победник. Ние не сакаме Албанците да губат мандати со расцепкувањето на гласот по малите партии. Неколку пати сум нагласил дека треба да се обединат против ДУИ, само и само да не губат Албанците, затоа што тоа е болно. Заедно можеме да бидеме посилни и помоќни, рече Ахмети.
Претставниците на Коалиција за промени и правда денеска од Берово и Делчево им се обратија на земјоделците.
– Македонија има капацитети и можности за земјоделски развој и производство кое ќе ги покрие не само потребите на граѓаните за храна, туку со добра земјоделска стратегија може и да извезува земјоделски производи. Наместо тоа во последните 10 години увозот на храна е зголемен за 50%, сточниот фонд е намален за 2/3, а субвенциите место на вистинските земјоделци и сточари се исплаќаа на концесионери-криминалци и партиски војници кои немаат врска со земјоделство и сточарство. Тоа ќе престане. Субвенциите ќе продолжат да се исплаќаат, но на вистинските земјоделци и ќе бидат врзани во триаголникот производител-откупувач-извозник, рече Весна Стимановска, нолсител на листа во оваа изборна единица.
Кандидатот за пратеник од Коалицијата ВМРО за Македонија Ден Дончев на ѓителите на скопската општина Кисела вода им ја претстави програмата во делот на имотните листови и легализација на имотот.
– Провладините медиуми известуваат дека постојано се врачуваат имотни листови и дека над 4000 објекти се легализирани но не објаснуваат како постојано становите се продаваат по неколку пати. Ќе инсистираме на воведување на систем кој нема да дозволи еден стан да биде продаван два – три, па и седум пати, посочи Дончев.