Групата „Го сакам Водно“ денеска со прес конференција пред Град Скопје уште еднаш ќе се обиде да ја сопре намерата на надлежните дел од гасоводната мрежа да се гради низ парк шумата Водно.
„Без официјална одлука на Влада, без одобрение од Град Скопје, со долга листа на неправилности во целата постапка за градење на оваа делница на гасводот, во издавање на одобрението за градење, деновиве багерите по неколку месечна пауза продолжиле на терен да рамнат и да го кршат сртот. Државава вака мисли да продолжи да работи? На овој начин?!“, напишаа вчера на својот официјална фејсбук страница од групата „Го сакам Водно“.
Од таму посочуваат неколку аргументи, според кои, како што велат тие, може да се заклучи дека има отстапување.
„Багерите работеле деновиве, по старото сценарио, кое години наназад добро се установи, во ек на летни одмори удри и гради против граѓанскиот став кој аргументирано бара градење ндвор од Водно. Порамнето, искршен сртот, без официјална одлука на Влада!!! И не, да бидеме јасни, не се како што рекоа МЕР и вицепремиерот Кочо Анѓушев десет метри и не е по изменетата траса која ќе ја намалела штета, туку по старата. Одобрение за градење издадено без одобрение на Град Скопје под чие владеење е парк шумата Водно. Студии за оцена на влијанието на проектот врз животната средина кои не го разгледуваат посебно заштитеното подрачје на парк шума Водно. Јавни расправи за кои јавноста не била известена и не била присутна. Распишан тендер на МЕР за изградба на гасоводот, месеци пред да бидат воопшто овластени од Владата за изградба“, пишува групата на нивниот фејсбук профил.