Вкупно 23 кандидати за државен јавен обвинител се јавиле на огласот што го распиша Владата на 14 септември, а завршува денес, објави „Судство.мк“. Последните три кандидатури пристигнале денеска по пошта. Најголем број од оние што претендерираат на највисоката функција во Обвинителството се адвокати, поранешни и актуелни судии, обвинители.
Од позвучните адвокатски имиња се пријавиле: Ѕвонко Давидовиќ, Александар Тортевски, Еленко Миланов, Тони Менковски, Арбен Гоља, Кирил Смичковски, потоа, поранешниот судија Валентин Зафировски, поранешниот обвинител Александар Наков, судијата д-р Лазар Нанев…Од редот на обвинителската фела, кандидатура поднел и членот на Советот на јавни обвинители и заменик во Републичкото јавно обвинителство, Љупчо Јовевски, како и обвинителката од организиран криминал, Лидија Раиќевиќ. На листата на пријавени се и нотарката Лорија Ваневска, Сефула Османи, Крсте Крајовски и други.
Во правосудните кругови најголеми шанси му се даваат на Јовевски, како човек од „внатре“, кому добро му се познати проблемите на фелата. Јовевски претходно работеше и како судија и четири години беше претседател на Основниот суд-Скопје 2. Добро котираат и адвокатите Давидовиќ и Тортевски, но клучниот избор ќе зависи од тоа дали ќе се оди на внатрешно или надворешно решение.
По пријавувањето на кандидатите, Советот на јавните обвинители потоа, по барање на Владата, во рок од 15 дена доставува образложено мислење во писмена форма за сите пријавени кандидати на огласот што ги исполнуваат условите.
Мислењето на Советот е обврзувачко за Владата, која пак предложените кандидати ги доставува до Собранието.
Ако Советот не даде мислење во рок од 15 дена, следуваат дополнителни 15 дена за мислење, по што, ако нема писмено известување, се смета дека мислењето е позитивно. Доколку Советот не даде позитивно мислење за ниту еден од пријавените кандидати, Владата не може да утврди предлог за именување јавен обвинител и може да му предложи на Собранието да го повтори огласот.
Мандатот на државниот јавен обвинител е шест години, со право на повторен избор.