Градоначалничката на Град Скопје Данела Арсовска најави дека од следната недела отпочнува со редовни контакти со медиумите, не само со брифинзи, туку и со прес – конференции на кои ќе се елаборира што е тоа што се случува во градот.
-Јас со мојот однос мислам дека сум целосно спротивност од она кое што сме го имале во претходното раководство на градот. Планирам да воспоставам еден можеби поинаков начин на соработка и од следната недела па натаму со отпочнување на редовни контакти со медиумите, не само со брифинзи, туку и со прес конференции едноставно ќе се елаборира што е тоа што се случува во градот, истакна Арсовска во емисијата „Само интервју“ на Канал 5 телевизија.
Таа додаде дека сака да има одговор на сите прашања кои ги мачат граѓаните, а со еден месец како градоначалник тоа не е можно.
-Отпочнати се процесите за сите работи, не само за проектите кои треба да се реализираат туку и за ревидирање на сето она кое што се случува во градот. Навистина наидуваме на зачудувачки работи и верувам дека за истите низ еден процес кој што ќе биде транспарентен понатаму и ќе биде разоткривани состојбите, рече Арсовска.
Говорејќи за БРТ превозот, Арсовска рече дека за тоа не постои ниту презентација пред Совет на Град Скопје, а и одлука на Совет на Град Скопје, а тие се претставниците на граѓаните во градот. – Преземале обврска дека ќе потрошат 70 милиони евра, а Советот не донел одлука, изјави градоначалничката на Град Скопје, додавајќи дека ниту скопјани се прашани, ниту запознаени за истото.
Таа додаде дека постојат и ризици од овој проект и граѓаните треба да знаат зошто БРТ не е најдобро решение.
– Ризици се како отстранувањето на средишното зеленило од Партизанска, но поголем ризик е што под тоа зеленило се наоѓа главната водоинсталација за питка вода за Скопје. Дали скопјани биле запознаени дека треба да се гради нов мост кај мостот Обединети нации и истото не вкалкулирано во буџетот од 70 милиони евра и дека новиот мост ќе е сериозна задача од финансиска гледна точка детектирано е, но и од нормалниот живот. И тоа е дополнителен трошок од над 6 милиони евра, вели Арсовска.
Според Арсовска, чесно е да се презентираат овие работи пред скопјани и да одлучат дали е ова добро решение за нив.
– Јас понудив концепт за кој граѓаните се решија, но и споменав референдум. Има многу напади секојдневно и закани, но немам намера да потклекнам пред истите. Референдум е една од опциите кои може да се понудат дали граѓаните сакаат едно или друго решение. Референдумот како опција и треба да се практикува за решенија како што е БРТ кое ќе го оптовари буџетот на државата за 70 милиони евра, нагласи Арсовска.
Во однос на намалување на цената на паркинг, градоначалничката Арсовска рече дека е испратено барање и е отпочната процедурата, за што се чека одлука од управниот одбор на јавно претпријатие Градски паркинг со која што ќе прифати да ги намали цените за паркингот.
-Веќе е отпочната процедурата, дадено е до јавното претпријатие Паркинзи и тие треба да донесат соодветна одлука на нивниот управен одбор. А, понатаму тоа доаѓа до Градот Скопје на прифаќање од страна на Советот, појасни Арсовска и додаде дека ќе има 25 отсто намалување на услугите на градскиот паркинг во Скопје.