Дрисла е единствената депонија во земјава која исполнува минимум еколошки стандарди. Но, по проверките на надлежните, Дрисла стана асоцијација за загадувањето на воздухот во Скопје.
Откако Дрисла беше казнета со 8500 евра поради испуштање токсични материи во воздухот, доби рок до крајот на февруари да постави водени филтри на оџакот, а до почетокот на летово да го инсталира современиот инсенератор. Печката сега смее да работи осум часа дневно, но само кога загаденоста на воздухот во Скопје е во рамки на нормалата.
Раководството на депонијата, а и надлежните државни институции тврдат дека од почетокот на годинава не се согорува медицински отпад туку дека тој само се складира.
Екипата на емисијата 360 степени на Алсат М, објави видео снимено во петокот, на кое се гледа дека таму има само еден контејнер со медицински отпад што чека уништување. Тоа е премногу мала количина отпад во услови на, како што се тврди, двонеделно неработење на печката. Дали, сепак, некој ја мами јавноста?