100.000 вакцини на „Фајзер“ преку Ковакс механизмот ќе стигнат утре во Северна Македонија. Кинеските вакцини „Синовак“ пак ќе стигнат во Скопје в недела, 27 јуни, со два авиона во 14 и во 16 часот, со две пратки со по 250 илјади вакцини, најави денеска министерот за здравство Венко Филипче.
Вакцините, кои овој пат ќе стигнат одеднаш во поголема количина, ќе се чуваат во фрижидерите во Поликлиниката „Јане Сандански“ во Скопје и на Институтот за судска медицина, а ќе биодат дистрибуирани на вакциналните пунктови оф понеделник, откако ќе завршат сите административни процедури за нивна евиденција во Агенцијата за лекови МАЛМЕД.
Министерот Филипче најави дека во следниот период следува забрзано темпо на вакцинација. Филипче вели оти се покажало дека вакцините штитат и од индискиот сој на коронавирусот.
„Има случаи во други земји каде и вакцинирани се заразиле со индискиот сој, но во огромен процент минале со лесна клиничка слика и без хоспитализација. Нашата проценка укажува дека некој нов ризик од нов бран сега во скоро период нема. Но затоа треба да бидеме внимателни. Има случаи на вакцинирани граѓани кои се заразиле со индиски сој во некои земји. Меѓутоа во 98% клиничката слика им е послаба, и нема потреба од хоспитализација. Затоа кај нас сега следува едно забрзано темпо на вакцинација“, вели Филипче.
На вакциналните пунктови во државата заклучно со завчера вакцинирани се вкупно 281.847 граѓани. Преку веб платформата вакцинација.мк досега се пријавиле 458.040 граѓани.