Случувањата на Западен Балкан ќе бидат една од поважните теми кои денеска ќе бидат дискутирани на состанокот ка министрите за надворешни работи на земјите членки на Европската унија. Дискусијата за регионот следува по посетата во земјите од Западен Балкан на високата претставничка за надворешна работа на унијата Федерика Могерини.
На седницата на Советот на министри ќе зборува токму Могерини каде што ќе изнесе информирации до министрите за разговорите од нејзината посета на Западен Балкан, а потоа треба да се усвојат заклучоци врз база на кои ќе се подготвува извештајот за Западен Балкан којшто ќе биде донесен на Самитот на ЕУ во четврток во Брисел.
Могерини по посетата ги брифирала високите претставници во ЕУ дека состојбите на Западен Балкан се тензични и побарала уверлива поддршка за евроинтеграциите на овие држави.
Могерини во Македонија истакна дека вратите на ЕУ се отворени за македонските граѓани, но дека е прашање на политичка волја на лидерството дали ќе се продолжи во овој правец. Таа побара од претседателот Иванов да го даде мандатот на мнозинството во парламентот, да се премисли и да не го крши Уставот.