Утре во Скопје почнува четиринаесеттата регионална конференција на Македонскиот ПЕН-центар, на која, освен домашните автори, ќе учествуваат и дваесетина писатели од Србија, Бугарија, Романија, Словачка, Словенија, Косово, Хрватска, Црна Гора, Албанија и од други земји во регионот.
Свеченото отворање на конференцијата е закажано за 6 утре вечер, а на 7 јуни писателите ќе расправаат на тема „Зборот и слободата“, за што воведно излагање ќе има академик Ферид Мухиќ, член на управата на Македонскиот ПЕН.ж
Ќе бидат претставени и неколку книги на писатели од соседните ПЕН-центри преведени на македонски јазик. Истиот ден, во вечерните часови, во Друштвото на писателите на Македонија ќе се одржи меѓународно поетско читање со учество на странски и домашни поети. В петок попладне ќе се одржи и средба на претставниците на Балканската мрежа, која од неодамна егзистира во рамките на меѓународниот ПЕН.
Вчера на годишното собрание на Друштвото на писателите на Македонија, писателот Христо Петрески рече:
„Kај нас гласот на писателот, на уметникот, на интелектуалецот се наоѓа некаде во шепотот, во она што често го велиме: „Внимавај, некој да не слуша“, како некои трауми од минатото. С` она што го мислиме не треба да го кажуваме само преку нашите дела, туку да го кажуваме не како заталкани индивидуи, како неколку среќници што имаат колумни. За да бидете гласни, треба да имате и приемник. Нашиот глас ни се враќа како ехо од празен бунар и никој не сака ни да го слушне. Kолку и да се обидуваме да бидеме гласни, треба да се запрашаме дали некој сака да го слушне тоа. Дали денеска не се слуша најгласно шушкањето на книжните пари? Затоа с` уште пишуваме во меѓуредови, с` уште сме полугласни“.