Зицерот остана зицер, Вадуц не се претвори во „минско поле“. Фудбалската репрезентација на Македонија, очекувано, го совлада Лихтенштан со 3:0 за прва радост во петтиот настап во квалификациите за Светското првенство во Русија, но и прва гостинска по пауза од седум години.
Трите бода ги најави Бобан Николов со евроголот во 43 минута, ги потврди Илија Несторовски во 68 минута и во 73 минута. Напаѓачот на Палермо не успеа да комплетира и хет-трик во 90 минута по промашениот пенал што самиот го изнуди.
Македонија одигра под нивото од претходните четири квалификациски средби што ги загуби, но победи благодарение на квалитативната разлика во однос на домашната селекција. Дефанзивно ориентираниот Лихтенштајн се пробиваше цело полувреме и, конечно, беше пробиен во 43 минута. Николов го дочека на волеј нафрлувањето од Тричковски и биеше неодбранливо за негов првенец во сениорската репрезентација.
Несторовски остана без хет-трик во 90 минута
Второто полувреме донесе поголема слобода во играта. Лихтенштајн за нијанса се подотвори и остави многу повеќе простор за македонските репрезентативци одошто беше случај во првиот дел. Ангеловски притоа додаде на офанзивност, свежина и брзина во тимот со внесувањето во игра на Трајковски, на Давид Бабунски и Ѓорѓев како поддршка за Пандев и Несторовски во нападот што резултира со уште два гола во мрежата на Јеле.
Двата ги потпиша Несторовски. Првиот во 68 минута по нафрлување од Пандев, а пет минути подоцна во погодок претвори и отпадок по ударот на Ристовски и одбиената топка од противничкиот голман. Резултатот до крај остана непроменет иако можеше да биде и поубедлив во корист на Македонија. Покрај најстрогата казна што не ја искористи првотимецот на Палермо, во неврат завршија и уште неколку закани кон голот на Лихтенштајн.
„Црвено-жолтите“ со 69 отсто посед на топката и 605 пасови од кои 536 беа прецизни
Надмоќта на Македонија се согледува и низ статистичките показатели на натпреварот. Лихтенштајн не упати ниту еден удар во рамки на голот на Столе Димитриевски за разлика од 12. на Македонија. Шест од нив мина крај стативите или над гредата, а исто толку одеа во нивни рамки од кои три отседнаа во мрежата. Избраниците на Игор Ангеловски имаа 69 отсто посед на топката наспротив 31 отсто на домашните играчи.
Македонските репрезентативци проигруваа петпати повеќе од противничките (605 – 172), сооднос што е, отприлика, ист ако се земат во предвид само прецизните додавања (536 – 122). Сето ова во контекст на заслужената победа на „црвено-жолтите“ и разведрување на амбиентот пред пријателската средба во вторник против Белорусија во Скопје.
Лихтенштајн – Македонија 0:3
Полувреме: 0:1. Стадион: „Рејнпарк“ во Вадуц. Гледачи: 3.500. Главен судија: Жонатан Лардо. Асистенти: Лоран Конот и Фредерик Годелан (сите тројца од Белгија). Жолти картони: Гепел, Хаслер (Лихтенштајн); Нестотовски (Македонија). Стрелци: Николов 43′, Несторовски 68′, 73′ за Македонија.
Лихтенштајн: Јеле, Гепел, Малин, Рехстајнер (Волфингер 78′), Марс. Бихел, Бургмеер, Март. Бихел (Селе 83′), Губсер, Хаслер, Салановиќ (Брандл 87′), Фрик. Селектор: Рене Паурич.
Македонија: Димитриевски, Ристевски, Шиков, Тричковски (Да. Бабунски 78′), Пандев, Ибраими (Трајковски 64′), Ристовски, Велковски, Николов, Спировски (Ѓорѓев 85′), Несторовски. Селектор: Игор Ангеловски.
Квалификации за СП 2018
Резултати, 5 коло
Група Д
Грузија – Србија 1:3
Република Ирска – Велс 0:0
Австрија – Молдавија 2:0
Табела: Србија 11, Република Ирска 11, Велс 7, Австрија 7, Грузија 2, Молдавија 1.
Идно коло (11 јуни): Србија – Велс, Република Ирска – Австрија, Молдавија – Грузија.
Група Г
Лихтенштајн – Македонија 0:3
Шпанија – Израел 4:1
Италија – Албанија 2:0
Табела: Шпанија 13, Италија 13, Израел 9, Албанија 6, Македонија 3, Лихтенштајн 0.
Идно коло (11 јуни): Македонија – Шпанија, Италија – Лихтенштајн, Израел – Албанија.
Група И
Хрватска – Украина 1:0
Косово – Исланд 1:2
Турција – Финска 2:0
Табела: Хрватска 13, Исланд 10, Украина 8, Турција 8, Финска 1, Косово 1.
Идно коло (11 јуни): Исланд – Хрватска, Финска – Украина, Косово – Турција.