Смее ли градоначалникот на Општина Аеродром и општинскиот совет да донесуваат детални урбанистички планови, да распишуваат тендери и да носат одлуки кога нивниот мандат е пред крај и тие имаат само како технички функции. Ова прашање се отвори, неколку дена откако советниците во Аеродром дадоа согласност за детален урбанистички план со кој е предвидена изградба на неколку висококатници во општината.
СДСМ: ЌЕ ЈА ПОВЛЕЧЕМЕ ОДЛУКАТА ЗА СПОРНИОТ ПЛАН
Општините, советниците и градоначалниците не смеат да распишуваат тендери. Не смеат да носат детални урбанистички планови кои се на штета на граѓаните додека советниците и градоначалниците имаат само техничка функција. Ова денеска го изјави претседателот на Комисијата за локална самоуправа на СДСМ.
„Посебно нагласуваме дека, во услови на техничко функционирање на општините, советниците и градоначалниците не смеат да распишуваат тендери! Примерот во Општина Аеродром, каде градоначалникот Ивица Конески и советниците на ВМРО-ДПМНЕ за тендер интереси, без согласност од граѓаните, по итна постапка, изменија Детален урбанистички план, е класичен доказ за работење спротивно на законот. Согласно Законот за локална самоуправа, мандатот на сите членови на советите на општините и на сите градоначалници е четири години и е веќе истечен! Советите и градоначалниците, во периодот што следи, своите надлежности мора да ги извршуваат исклучиво технички, со цел да се даваат услугите кои им се потребни на граѓаните“, рече Павлески.
Тој додаде дека по средината на мај целосно прекинува мандатот на градоначалниците и советниците, со што тие губат секакво право на раководење со општините.
„Општините ќе останат обезглавени, а последиците ќе паднат врз граѓаните кои не ќе може да ги реализираат своите потреби. Затоа, ќе ја реализираме мнозинската волја на граѓаните според Деловникот, Уставот и законите и ќе има и нова Влада и датум за нови локални избори“, додаде Павлески.
Оваа реакција на Павлески доаѓа неколку дена откако мнозинството на ВМРО-ДПМНЕ во Советот на Општина Аеродром го изгласаа новиот детален урбанистички план И10 со кој се дозволува изградба на неколку висококатници во општината, кај Мајчин дом, на Кејот на Вардар и во населбата Острово.
ЗЕЛС ТРЕБА ПОСЕРИОЗНО ДА СЕ ЗАНИМАВА СО ОВА ПРАШАЊЕ
Професорката на Правниот факултет во Скопје, Ана Павловска-Данева, која за НОВА ТВ изјави дека проблемот е настанат уште кога беше пропуштен рокот за локалните избори.
„Рокот за распишување на локалните избори кои требаше да се одржат во првата половина на мај истече, тоа значи дека тогаш истекува и мандатот на градоначалниците и советите и Македонија останува без локална самоуправа“, вели Павловска-Данева.
Според неа градоначалниците, откако ќе им истече мандатот нема да смеат да потпишуваат ништо, а советите нема да можат да заседаваат и да носат општи акти.
„Овластувањата, или барем дел од нив се преносливи, а на советите не се. Советот и неговите одлуки не може никој да го замени. Пренесувањето на одлуките од страна на градоначалниците ќе зависи од случај до случај, „ад хок“ и тоа не е добро. Мислам дека ЗЕЛС треба многу сериозно да се позанимава со ова прашање“, смета професорката.
АЕРОДРОМЦИ СЕКОЈ ДЕН НА ПРОТЕСТ
Во ситуација кога во зимски услови жителите на Аеродром и Ново Лисиче се гушат од смог и загаден воздух, советниците и градоначалникот Ивица Коневски неколку дена пред истекот на нивниот мандат, даваат согласност за детален урбанистички план на кој се противат жителите на оваа општина. Аеродромци, неколку дена по ред протестираат пред општината со цел да не се дозволи уништување на зеленилото во општината.
Револтот на аеродромци е поголем затоа што тие се сомневаат дека градоначалникот дозволил да се донесе деталниот урбанистички план за тој да реализира свои бизнис интереси. Според документите, една од спорните парцели на која е предвидена изградба на деветкатница му припаѓа на Орце Камчев.
„Сега чаре ни е само Уставниот суд оти имаме сериозни забелешки на планот кои не се замени предвид. Со месеци се бориме против усвојувањето на овој план. Тој еднаш беше вратен на доработка, а од Општината најавија дека ќе ги земат предвид забелешките од граѓаните“, велат жителите.
Голем дел од нив се пожалија дека единствениот одговор што го добиле на забелешките е дека тие не се прифатени.
Коневски вели дека планот е донесе во рамките на законот и за доброто на граѓаните. Според него, со изградбата на нови објекти, влегуваат пари во општините.
„Планот се носи во рамки на законот и во интерес на граѓаните. Со носењето на нови детални планови и изградба на нови објекти влегуваат финансиски средства во општината со кои ние реализираме голем број проекти. Ако се реши да се спречи градбата, или да се донесе одлука со која ќе се стопира градбата во сите општини во Град Скопје, тогаш општините нема да имаат можности да функционираат. 90 отсто од финансиите во општините доаѓаат од изградбата на објектите“, изјави денеска Коневски.
Овој детален урбанистички план се однесува на делот покрај Вардар од Железничка станица до Мајчин дом и предвидува низа нови објекти поради кои се одзема од зеленилото, како и сервисни улици и паркинзи во служба на новите објекти.