Студенчишко Блато останува строго заштитена зона додека не се изработи студија за валоризација по запирање на незаконскиот хотел во Лагадин.
Граѓанската иницијатива Охрид ЅОЅ заедно со Здружението за заштита на животните и животната средина Е.Д.Е.Н. со свои претставници учествуваше на стручната расправа за измените на Генералниот урбанистички план за Охрид 2014-2024 година
„Иако локалната самоуправа има должност за сите одлуки кои ја засегаат јавноста, за жал, информацијата за стручната расправа не беше достапна на официјалната веб-страница на Општина Охрид. Граѓаните имаат рок од 10 дена да ги достават своите коментари за предложените измени до Општина Охрид. Со огромно задоволство ја известуваме јавноста дека двегодишната битка на Охрид ЅОЅ конечно вроди со плод! Студенчишко Блато останува строго заштитена зона сè додека не се изработи студија за негова валоризација“ се вели во соопштението на „Охрид SOS“.
Причината за ревидирање на извонредната студија која веќе постои е заклучокот на влада од сто шеесет и шестата седница одржана на 12 ноември 2013 година. Во тој документ владата и препорачува на општина Охрид да поднесе ревидирана студија во која 4 до 5 хектари земја кои се предложени во самата студија за заштита на природното наследство ќе бидат третирани како заштитено подрачје во иднина, а Министерството за животна средина и просторно планирање во најкраток можен рок соодветно да постапи.
„Прашуваме, кои се тие експерти во владата кои утврдиле дека блато има десетпати помалку од неговата реална површина? Според податоците до кои со постојано излегување на терен во опсежен временски период дошле научниците кои ја изработиле Интегрираната студија за Студенчишко Блато, се предлага површината на блатото да изнесува 63,97 ха со соодветни зонирања на активно управување, одржливо користење и строга заштита. Кои се аргументите на владата да го поткрепи своето барање за површина на блатото од 4 до 5 хектари? Бидејќи научни аргументи сигурно не се!“ се вели во соопштението.
Нареден чекор, според нив е Секторот за урбанизам заедно со Министерството за транспорт и врски да распише тендер за фирма која ќе ја изработи ревидираната студија. Министерството за транспорт и врски ќе ја финансира таа студија.
„Според истражувањето на Здружението Е.Д.Е.Н. кое беше спроведено на близу 250 граѓани, 100% од испитаниците одговориле дека Студенчишко Блато треба да се заштити. Тоа беше единствениот едногласен одговор на граѓаните кои ја пополнија анкетата. Блатото – единствениот и последен филтер на Езерото, не само што треба да се заштити, туку и задолжително е да се ревитализира. Само за потсетување, во ноември 2012 г. додели 100.000 евра на Општина Охрид за ревитализација на Блатото. Средствата беа вратени назад на донаторот поради неажурност на Општината и Блатото остана да чека некои подобри времиња“ се наведува во соопштението.