Сончевото и многу топло време со висок УВ индекс на зрачење 9, ги зголеми повиците во брзата помош. Дури 40 граѓани побарале лекарска помош денеска до 15 часот. На шест граѓани им се слошило на улица по што интервенирала брзата помош. Лекарите апелираат до граѓаните доколку забележат карактеристични симптоми кои укажуваат на колапс веднаш да се повлечат во сенка.
-Апелираме до граѓаните доколу почувствуваат вртоглавица, заматување пред очи, препотување, дури и нагон за повраќање веднаш да се се повлечат во сенка, да легнат и да пијат многу течности.Тоа се првите симптоми кои може да доведат до состојба на колапс изјави за НОВА доктор Маја Поповска раководител на Службата за итна медицинска помош.
Доколку овие симптоми продолжат, а лицето не се повлече од сонце можно е да дојде и до топлотен удар . Поповска потенцира доколку се случи такво нешто треба веднаш да се побара лекарска помош.
-Она на што граѓаните треба да внимаваат се лесните и течни оброци во овој период, пиење на многу вода, носење на лесна,светла и широка облека за да има испарување на течноста од телото обајаснува Поповска.
Од вчера цела држава е во жолтата алертна фаза што значи дека е зафатена од силен топлотен бран.
Од Министерството за здравство ги предупредуваат граѓаните да се придржуваат на советите од лекарите. Да избегнуваат престој на сонце меѓу 11 и 17 часот, задолжително да носат очила за сонце и шапка поради високиот УВ индекс, да консумираат многу течности, без потреба да не излегуваат од дома, а хроничните болни редовно да ја земаат пропишаната терапија.
Лекарите потенцираат дека истите препораки важат и за децата и за возрасните. Според прогнозите на синоптичарите топлото време и високите температури се очекува да траат и во наредните денови.