Новата реформска влада на Македонија е сериозно подготвена и цврсто решена од земјата да направи европска држава. Ова денеска го изјави министерот за надворешни работи, Никола Димитров, на состанокот на министрите за надворешни работи од земјите на Западен Балкан што се одржува во Брдо кај Крањ, во рамките на самитот на лидерите од Процесот Брдо – Бриони.
„Ги убедував моите колеги дека жедта што постои кај македонската јавност, кај граѓаните, по овој кошмар низ кој поминавме, за силни институции, за правда, за закон над политиката е голема шанса не само за Македонија, туку и за регионот, како и за самиот процес на пристапување на кој можеме да му дадеме смисла. Шансата е во тоа што новата реформска влада на Република Македонија е сериозно подготвена и цврсто решена од нашата земја да направи европска Македонија“, изјави Димитров.