Доколку идната недела во вториот круг се потврди резултатот од вчерашните парламентарни избори во Франција, новиот француски Парламент ќе има две третини нови и сосема непознати политичари.
Социјалистичката партија речиси исчезна од политичкиот пејсаж а во нешто подобра форма се десните Републиканци. Екстремната десница и радикалната левица исто така се “загубија” во новиот жолт бран на партијата на новиот француски претседател Емануел Макрон – “Републиката напред”.
Макрон вети и оствари. Движењето “Напред!” креирано пред една година сега е првата политичка сила во Франција со освоени 32 отсто од гласовите. А тоа е осум поени повеќе отколку резултатот на Макрон на првиот круг на претседателските избори на 23 април.
Републиканците, партијата на двајцата екс претседатели Саркози и Ширак, освоија 21,5 отсто а екстремистите на Марин Ле Пен 13 отсто. Со 10 отсто резултат, социјалистите, партијата на досегашниот претседател Франсоа Оланд, доживеа историски неуспех.
Првите проекции бројот на седишта во Асамблејата најавуваат дека од 577 места во 435 ќе седнат пратениците од Републиката напред. Републиканците, партијата на Никола Саркози и Жак Ширак, падна на 90 места, социјалистите на одвај 25 седишта, екстремната десница на Марин Ле Пен има одвај десетина пратеници, а радикалната левица на Жан-Лук Меланшон на 14 пратеници и 10 места за други мали партии.
Традиционалните француски политичари не го кријат утринава нивното огромно разочарување. Или, подобро речено – огорченоста. Еден од блиските соработници на Саркози утринава на едно францско радио изјави дека “му се повраќа” од гласачите кои го дале гласот на непознати лица, лица од граѓанскиот сектор.
Помеѓу новите француски пратеници ќе најдете претпиемачи, научници, математичари, адвокати, судии, спортисти, невладини организации, интелектуалци, професори…
Политичкиот земјотрес во Франција носи промени од досега невидена размери. Тоа значи дека во Парламентот ќе влезе цела војска нови пратеници без никакво политичко искуство.
А традиционалните партии ќе мораат да ги обвновуваат нивните политички куќи и програми од подрумот од покривот.
Ако вториот круг ги потврди овие резултати на 18 јуни, Макрон и неговите нови политичари ќе треба да го испорачаат ветеното.
Очекувањата на Французите се однесуваат на улогата на Франција во светот. Првите чекори на Макрон на светската сцена се охрабрувачки. Но пред него и новите пратеници стои уште многу работа.
Потешката задача се наоѓа дома. Републиката напред! ќе треба да ги победи скептицизмот и недовербата на оние кои не гласале за нив. А тоа се пред се оние Французи кои не успеале да се снајдат во новиот глобален свет, оние кои се дел од 10те отсто невработени. Според првите оценки, тоа се луѓето кои не излегле на гласање и оние кои не веруваат во промените на Макрон. Нивниот број е голем – над 50 отсто.