Принципиелен став на сите зелени партии и на тоа се инсистира и во другите парламенти е пратениците да не бидат дел од пратеничка група, туку да делуваат самостојно, реагираа денеска од ДОМ на вчерашните обвинувања дека ДОМ го саботира владејачкото мнозинство во Собранието.
„Деловнички, сите партии или пратеници во Собранието имаат право да се изјаснат дали ќе работат како дел од некоја пратеничка група од минимум пет пратеници, или како независни пратеници. Двете пратенички од ДОМ, Лилјана Поповска и Маја Морачанин, се изјаснија за истиот статус што го имаше Поповска претходно во минатиот период, кога никој тоа не го спореше. Ова е принципиелен став на зелените партии, на кој инсистираат и во другите парламенти“, пишува во соопштението на ДОМ.
Од партијата велат дека останува дел од коалицијата со СДСМ и останатите партии и поединци кои се бореа за демократизација и правна држава.
„Веќе трета година сме на иста линија за потребата од мирна разврска на политичката криза низ два паралелни процеса – политички и правен, поради што бевме дел и на широката Демократска платформа која собра граѓани од различно етничко, верско и идеолошко потекло“, реагираа од ДОМ.