Поранешниот генерален секретар на Владата, Кирил Божиновски денеска преку соопштение испратено од партијата се огласи за обвинувањата дека вработувал луѓе кои земале плата, а не доаѓале на работа. Овие информации ги обелодени генералниот секретар на Владата, Драги Рашковски на прес-конференција.
Божиновски вели дека сите седум години додека бил на функција, работел чесно, посветено и професионално. Во писмената изјава на Божиновски се вели дека сите посочени постапки за вработувања биле спроведено согласно Програмата за вработување на припадниците кои не се мнозинство во Република Македонија донесена на седница на Влада.
„Пред да започнат постапките за вработувања во Генералниот секретаријат беше барана согласност од Министерството за финансии и беа запазувани сите законски одредби од Законот за државни службеници. Да не заборавиме на политичката криза во која се наоѓаше државата и распишувањето на изборите во 2015/2016 година кога Владата функционираше како техничка и голем дел од активностите кои што требаше нормално да бидат извршувани беа ставени во мирување. Небулозно е Драги Рашковски да се заканува дека ќе ми поднесе некаква си кривична пријава затоа сто сум исплатувал плати на овие лица, кога и тој самиот на истите овие лица им ја исплатил платата за месеците мај, јуни и јули“, пишува во изјавата на Божиновски.
Тој ги отфрла обвинувањата на Рашковски и најавува судска постапка за да го заштити својот углед, но и угледот на сите вработени во Генералниот секретаријат.