Премиерот Зоран Заев во функција на претседателна СДСМ денеска се сретна со пратениците од Европскиот парламент, Иво Вајгл, Едвард Кукан и Кнут Флекенштајн.
На средбата, како што соопшти прес службата на СДСМ, разговарале за актуелната политичка состојба во Република Македонија во пресрет на локалните избори, спроведувањето на зацртаниот реформски процес како и за надворешната политика и евроатлантските процеси.
Заев ги информирал европратениците дека спроведувањето на Реформскиот план 3-6-9 е инклузивен процес што се одвива со засилено темпо и дека во неговата реализација целосно се вклучени сите министерства.
Во однос на меѓународната политика, Заев го истакнал унапредувањето на односите на Република Македонија и соседите, посочувајќи го Договорот за добрососедство со Република Бугарија и со соработката со сите останати соседи, со што како што рекол „докажавме дека можеме сами да ги решаваме отворените прашања во заемна корист, без при тоа да чекаме помош од посредници во процесот на договарање“.
Во пресрет на локалните избори, Заев истакнал дека очекува победа на СДСМ и коалицијата на фер и кредибилни локални избори.
-По парламентарните избори и локалните избори ќе ја докажат потребата од мултиетничкиот карактер на партиите. Локалните избори на кои очекуваме победа, ќе ги докажат придобивките од концептот на едно општество во кое силно веруваме, се вели во соопштението.