Советот на Врховниот суд на 14 септември ќе расправа за барањето за заштита на законитоста кое Специјалното јавно обвинителство го поднесе за пресудата на Ѕвонко Костовски во случајот „Пуч“.
„Јавното обвинителство за гонење на кривични дела поврзани и кои произлегуваат од содржината на незаконското следење на комуникациите поднесе барање за заштита на законитоста за овој случај на 06.10.2016 година. После повеќе писмени ургенции од страна на Врховниот суд на Република Македонија , Специјалното јавно обвинителство конечно ги достави списите од предметот на 13.07.2017 година. Советот на Врховниот суд на Република Македонија кој одлучува по овој предмет определи термин за седница на 14.09.2017“, велат од Врховниот суд.
Барањето за заштита на законитоста СЈО го поднело за да се поништи пресудата за Костовски која според СЈО е незаконска.
Адвокатот Филип Медарски вели дека пресудата која е донесена не ги исполнува законските основи затоа што ги нема елементарните кривични дела, а во образложението на пресудата нема никаков доказ, Исто така како што вели Медарски, не може Костовски како помагач на кривично дело да биде осуден, а за главните сторители да нема пресуда.
СЈО кон средината на јануари го повлече обвинението за „Пуч“ бидејќи обвинителниот акт за овој предмет кој бил целосно различен од доказите со кои располага СЈО.